Home
परिचय
कृतियां
सम्मान
सहभागिता
साक्षात्कार
छवियां
आशीर्वचन
संपर्क
छेकड़लौ सवाल...
छेकड़लौ सवाल आखै देस पसवाड़ौ फोरयौ नवी तकनीक अर नवै जतनां सूं, कुणई नीं बच्यौ, कुणई नीं बच्यौ वीं फांफ सूं जकी सैधै ही मांय तांणी। वां दिनां कांईं थे बच्या? नीं, आ नीं हुय सकै, थे तौ सै सूं कंवळा मिनख हौ थे किंयां बच सकौ? स्यात इंडिया गेट माथै सै सूं पैला पूगणवाळां में हा थे? सरकार निकम्मी है- बलात्कार पेटै नवौ कानून बणै- ऐ ई क्यूं आं सूं ई अळगा तीखा नारा लगावणवाळां मांय हा थे। हां, थे आ ई तौ देखी ही वां दिनां कै समूचै जवानां में किंयां फूटै ही रीस जांणै बलात्कार किणी एक रै साथै नीं हर एक रै साथै हुयौ हुवै, मोदीजै हा थे वां दिनां रै बदळतै सोचनै देखनै। दीसै ही सरकार हालती थांनै अर साथै ई दीखै हौ बणतौ वजूद खुद रौ, चोखौ मुददौ पकड़नै थे बणै हा नेता। थे ई क्यूं, थारी विगत तौ म्हैं ई नीं भूल सकूं, देस रै फोरतै पसवाड़ै रै वां दिनां नै किंयां बिसरा सकूं? आखै दिन री भाजौभाज अर पांणी री बौझाड़ां, आंसूं गैस रै गोळां नै झेलता, मेट्रौ रै बंद करीजै टेसणां माथै धक्का खावता, छेकड़ थे कित्तौ दौरौ पकड़ता घरां जावणै सारू आटौ, कांईं थे वीं कानून नै भूल सकौ जकै पांण ओटौ मीटर माथै जावै हौ अर मीटर रात रै अंधेरै मांय कीं उतावळौ ई चालै हौ, कांईं थे वीं झाळ नै अजै ई मांदी करदी जकी थे परगटी ही 'फिक्स रेट' पेटै? बोल्या नीं? स्यात मांदी करदी। पण असली जुद्ध तौ घरां पूगनै हुयौ हौ- टाबर सगळा सूयग्या हा और तौ और थारी घर-धिराणी ई सूयगी, अर वीं पेटै आयेड़ी थांरी वा झाळ स्यात अजै ई मांदी नीं हुयी हुसी? घरधिराणी थांरी उडीक नीं करी, खाय-पीयनै सूयगी, औ कैड़ौ सागौ हुयौ जीवण रौ? पण म्हनै चेतै है कै थे झाळ नै पीयगा हा, क्यूंकै दिनुगै बेगी ई उठनै जावणौ हौ पाछौ इंडिया गेट। डर हौ कै जे बेगी नीं पूग्या तौ पुलिस रौ घेरौ पड़ जासी अर थे नीं हुय सकसौ टोळ भेळा, फोरजीतै नवै पसवाड़ै पासै। घरां थांरै अर घरधिराणी बिचाळै हुयी ही उण दिन खासी बतळावण बूझ्या हा वीं थांनै मोकळा सवाल, कांईं थांनै चेतै है गुपतावू कमरै मेंई रैया सवाल लगौलग? हां चेतै है क्यूंकै दीन्हा हा थे मोकळा पड़ूत्तर, पण घरधिराणी रै छेकड़लै सवाल सूं हुयग्या हा थे मूंन नीं हौ थांरै कन्नै कोई उथळौ अर तदई झाळ हुयी ही बेसी घाल्यौ हौ थे एक थाप, घरधिराणी हुग्यी ही लम्बलेट। थे बतायौ हौ कै वीं हमलै पछै वा पक्कायत ई भूलगी ही आपरौ सवाल पण थे नीं भूल सकै हा वींरौ सवाल अर करै हा जुगत नवै मुददै नै रुळावण री जकौ उठायौ हौ घरधिराणी आपरी देह रै हक पेटै। वीं बूझ्यौ हौ छेकड़लौ सवाल- कांईं एक पति लगैटगै रोजीनै नीं करै पत्नी साथै बलात्कार?